ಮಂಗಳೂರು: ಇಲ್ಲಿನ ಅಂತರ ರಾಷ್ಟ್ರೀಯ ವಿಮಾನ ನಿಲ್ದಾಣ (ಎಂಐಎ), ರಾಜ್ಯದ 2ನೇ ಅತ್ಯಂತ ಜನದಟ್ಟಣೆ ಹೊಂದಿರುವ ವಿಮಾನ ನಿಲ್ದಾಣ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. 2022-23ರ ಆರ್ಥಿಕ ವರ್ಷದಲ್ಲಿ 17,94,054 ಪ್ರಯಾಣಿಕರು ಬಂದು, ಹೋಗಿದ್ದು, ಕಳೆದ ವರ್ಷಕ್ಕಿಂತ ಶೇ 76 ಬೆಳವಣಿಗೆ ದಾಖಲಿಸಿದೆ ಎಂದು ಪ್ರಕಟಣೆ ತಿಳಿಸಿದೆ.
2021-22ರಲ್ಲಿ ವಿಮಾನ ನಿಲ್ದಾಣದಿಂದ 10,16,559 ಪ್ರಯಾಣಿಕರ ದಟ್ಟಣೆ ನಿಭಾಯಿಸಲಾಗಿತ್ತು. ನಿರ್ವಹಿಸಿದ 17.94 ಲಕ್ಷ ಪ್ರಯಾಣಿಕರಲ್ಲಿ, 12.08 ಲಕ್ಷ ಪ್ರಯಾಣಿಕರು ದೇಶೀಯ ಮತ್ತು ಉಳಿದ 5.86 ಲಕ್ಷ ಪ್ರಯಾಣಿಕರು ಗಲ್ಫ್ ದೇಶದ ಪ್ರಯಾಣಿಕರು.
2022-23 ಅವಧಿಯಲ್ಲಿ 14,475 ವಿಮಾನಗಳ ಹಾರಾಟವನ್ನು ನಿರ್ವಹಿಸಲಾಗಿದೆ. ಶೇ 42 ರಷ್ಟು ಬೆಳವಣಿಗೆ ದಾಖಲಿಸಿದೆ. ಇವುಗಳಲ್ಲಿ ದೇಶೀಯ ವಿಮಾನಗಳು,ಅಂತರ್‌ ರಾಷ್ಟ್ರೀಯ ಮತ್ತು ಸಾಮಾನ್ಯ ವಿಮಾನಯಾನಗಳ ಹಾರಾಟವು ಸೇರಿವೆ.
2021-22ರಲ್ಲಿ ಮಂಗಳೂರು ಅಂತರ ರಾಷ್ಟ್ರೀಯ ವಿಮಾನ ನಿಲ್ದಾಣವು 7,792 ದೇಶೀಯ, 2122 ಅಂತರ ರಾಷ್ಟ್ರೀಯ ಮತ್ತು ಉಳಿದ ಚಾರ್ಟರ್ಡ್ ಫ್ಲೈಟ್ ಸೇರಿದಂತೆ 10,212 ಎಟಿಎಂಗಳನ್ನು ನಿರ್ವಹಿಸಿದೆ. ಮಾರ್ಚ್ 2023 ರಲ್ಲಿ ಫೆಬ್ರುವರಿಗೆ ಹೋಲಿಸಿದರೆ ವಿಮಾನ ನಿಲ್ದಾಣವು ಪ್ರಯಾಣಿಕರ ದಟ್ಟಣೆಯಲ್ಲಿ ಶೇ 7 ಬೆಳವಣಿಗೆ ದಾಖಲಿಸಿದೆ. ಮಾರ್ಚ್‌ನಲ್ಲಿ 1,43,788 ಮತ್ತು ಫೆಬ್ರುವರಿಯಲ್ಲಿ 1,34,583 ಪ್ರಯಾಣಿಕರನ್ನು ನಿರ್ವಹಿಸಿದೆ ಎಂದು ಪ್ರಕಟಣೆ ತಿಳಿಸಿದೆ.
